【踏空拗柴】宣萱扭傷左腳有排唞 怕影響《尋秦記》電影版拍攝
傷左腳宣萱尋秦記
宣萱今日喺銅鑼灣出席活動,佢透露兩星期前扭傷左腳,今日仲係又腫又瘀,佢寄語大家唔好邊行邊玩手提電話,「喺街踏空拗柴,好彩呢個世界仲有好人,當時好大聲,啲骨好似斷,我痛到唔郁得企咗喺度,有個女士行過,問我『are you ok?』,我話『唔ok,因為好痛!』,原來佢行過聽到我啲骨『啪』一聲,之後扶我過隔籬街睇跌打,之後我一直飛,呢兩個星期不停腫,返到嚟睇西醫照X光,好彩冇骨折,最少要5、6個月先痊癒。後來朋友介紹睇中西醫合壁,驚好細微嘅骨斷裂,好彩冇,於是佢好大力幫我捽,同埋放咗瘀血出嚟,我痛到嗌到呢,佢講笑話,每次得一個病人,所以叫我嗌唔好忍住,仲叫我多啲用傷咗嘅腳單腳企,練番啲肌肉。」
宣萱現時最擔心會影響到明年1月開拍《尋秦記》電影版,「我唔知要唔要打,不過打都唔驚,因為用手打,我係驚要跑。」宣萱透露《尋秦記》電影版係電視版嘅延續,「所以有少少flashback(倒敘),但係成個拍攝手法唔同,因為一樣就冇乜意思。」佢表示《尋秦記》電影版喺貴州取景,拍攝唔算太辛苦。
精選娛聞,喺晒《娛果》
http://fb.com/appledailyent