【鳩嗚乜乜乜】
雅號「藍眼淚」嘅夜光藻紅潮，年初喺大埔內海湧現，吸引唔少人一窩蜂湧去觀賞，掀起一陣熱潮。費清同事小江子上周五晚（8日）至周六凌晨，喺將軍澳海濱公園岸邊，都影到橙紅色海面閃現藍眼淚嘅畫面（圖）。
近日紅潮襲港，南區淺水灣、深水灣等多個泳灘關閉。漁護署資料顯示，近日紅潮個案都係由夜光藻組成，呢啲藻類常見於本港水域，不含毒素，但仍有機會危及附近魚排同水中生物。
夜光藻本身係橙紅或墨綠色，但當海面有潮浪或被人為騷擾，體內磷質會發光，呈現藍光，所以又叫藍眼淚。而喺將軍澳海旁上周四起，亦浮起一片橙紅色紅潮，幾日都未消退，晚上當海浪拍岸，海面就會閃現藍色螢光，同幾個月前喺大埔岸邊嘅藍眼淚一樣。