生活落魄嘅泊車仔同冇人留意嘅網上音樂人，經歷一次綁架事件將兩人拉近，再因為一首未完成嘅歌將佢哋兩個牽上，睇落係有啲老套，但都仲會觸動你心靈嘅電影橋段，鄭中基（Ronald）同顏卓靈（Cherry）分別飾演電影《大樂師．為愛配愛》中這兩個角色。

兩人早喺新蒲崗接受專訪，今次係佢哋兩個首度合作，Ronald表示拍攝時大家都冇乜點排練，一埋位就正式拍攝。戲中主要以內心戲為主，他們都覺得電影主題曲《沒聽過的歌》對演出交流上有一定幫助，Ronald話：「拍之前我已經錄咗，而Cherry亦都要學識彈，加上我個角色每次一衝動起上嚟，就要聽到佢寫嘅呢首歌先可以冷靜落嚟。」

戲中Cherry被姜皓文、白只同Ronald綁架，更被綁喺圓型疊枱上以免佢走甩，Cherry話：「綁住上張枱度要用好耐時間，所以每次轉位我都話唔駛解，點知大家見我被綁造型就覺得好得意，然後就嚟同我自拍影相。有一幕講我要喺張枱拗身彈番起身，點知係好難用力，仲試過反過頭成塊面硬食撞落地下。」Cherry受皮肉之苦，而Ronald則提心吊膽，Ronald話：「劇組搭咗間水上屋，戲中我要開快艇，其實係臨時跟船家學，佢仲係爆住粗咁教，跟住我就自己嚟，有幕要夜晚喺大海中開住，啲浪又大，救生員又喺勁遠，只係放件救生衣畀我，嗰下係有啲驚。」

電影尾端，講述Ronald明知被拉，仍不顧一切現身為Cherry完成音樂創作比賽演出，回到現實生活中，Ronald指令佢最大動力去做一件事便係囡囡，佢話：「以前我成日飲酒，就係因為囡囡我就戒咗酒。」Cherry認同能令自己不顧一切付出嘅只有親人。今次電影圍繞住主題曲《沒聽過的歌》，身兼主唱嘅Ronald被問到會否有信心憑此歌奪得「金像獎最佳原創電影歌曲」？Ronald說：「我對金培達有信心。」

鄭中基
服裝：the baddies / Facetasm
髮型：Horace @ Hair Play
化妝：Midco Chu

顏卓靈
服裝：Vivienne Westwood, Geox
髮型：Hugo Poon @ Toni&Guy IFC
化妝：Vinci Tsang