歌手吳若希(Jinny)、謝文欣同譚嘉儀噚晚喺灣仔出席商會週年晚宴，佢哋為晚宴擔任表演嘉賓，Jinny笑言每逢出席呢個商會嘅嘉賓之後都會好旺，鍾嘉欣、雨僑都係出席完就結婚生B，連自己都唔例外，Jinny話：「之前係出席晚會後大半年就生，希望今年隔耐少少，所以都要小心啲。」

Jinny透露正喺澳門搬緊返香港，自己出入唔使咁辛苦，佢話：「年底會出碟還碟債，兩年冇出碟，之後要飛兩轉日本拍綜藝節目同劇集，生日都應該喺嗰邊過。」佢話老公都會過日本陪佢，仲會撇低囡囡過二人世界，問佢想收到咩嘢生日禮物？Jinny話：「折現啦，生活所有嘢要有嘅都有，冇謂花啲冇謂錢，感覺好老夫老妻。」不過佢就爆老闆叫佢唔好成日提屋企事，因為覺得Jinny仲係靚女形象。

Jinny又自爆生小朋友後記性好差，仲話長期唔記得戴婚戒，搞到老公都咋型話：「即刻入房戴番！」Jinny就解釋因為唔習慣戴首飾兼冇記性，又曾經唔見咗媽咪送嘅鑽石戒指，所以老公都會體諒。

另外，主人家王大業就話啲旺氣畀晒啲嘉賓，自己就未有着落冇拖拍，連家人都放棄咗佢，已經37歲嘅佢仲好恨搵到個結婚對象，問到父母有冇搵女仔同佢相體？王大業話：「唔好啦！咁老套，我又唔係怕羞，可能未到，希望一搵就搵到結婚對象，圈內圈外都冇所謂，最緊要溝通到。」

精選娛聞，喺晒《娛果》
http://fb.com/appledailyent