蘇兆輝、巴度正式客串，風頭輕輕蓋過復出的潘頓，或多或少會因為蘇兆輝名牌效應，叫座力因而分散，潘頓座騎獨贏賠率方面有機會回升，佢今期（4日）夫卜上陣，其中第九場「神威敖翔」會係重心之選。

角逐第九場三班1400米的「神威敖翔」，今季一而再讚方嘉柏保養做得好，七歲馬在上手馬房跑得密，上季已跑19場，直至季尾更連下兩城，今季方仔接手後，評分由高位起步，不但沒有因而演出失準，更保持上季餘勢接連跑得接近。

「神威敖翔」近兩戰田草1200米均入位，前仗輸俾「開心神駒」個半身位，本身力壓實力指標「金鼓齊鳴」跑第三，賽績已夠硬淨，上仗讓「勁無比」八磅，直路被前駒先發制人走甩，本身末段逐步檻上，明顯爆發力在1200米已經不夠用。

「神威敖翔」今仗加程回師1400米合適，特別要留意，潘頓是場棄「京京千里」及「遨遊神駒」而就之，124磅接近零死磅，馬房出王牌，有望殺出重圍。