陳靜（DaDa）本月16日出席活動時，佢先放幸福閃光彈，自爆拍拖有個台灣男友，DaDa仲話聖誕今年同屋企人度過，預埋男友融入家中，一齊開聖誕P，之後仲孖住出埠滑雪，大家都戥佢好開心之際。DaDa噚日突然喺微博寫咗：「一個人的快樂是一門藝術。」今日凌晨又係WeChat朋友圈留言：「沒有甚麼突然之間結束的，結束都有着漫長壓抑的伏筆。」一連兩日留言都都似有所暗示，據DaDa閨密透露，上周聖誕前，DaDa同男友閃分了。　

記者今日打畀DaDa，講到男友即咿咿哦哦，幾經追問，佢終於承認回復單身，DaDa話：「喺聖誕節前分開咗，我覺得一齊咗感覺冇唔一齊嗰時咁好，拍咗拖幾個月，時間好短，我同佢係識咗好耐，了解咗大半年先一齊，我一路覺異地戀幾好，我係鍾意有私人空間，但點知慢慢覺得我原來可以唔拍拖，有同無都好似冇乜分別，隨緣啦。其實我哋正式一齊只有3個月，中間只係見過一、兩次，霧水情緣，和平分開，但大家仲係好朋友。」

DaDa年尾倒數，特別有感觸，佢話反省呢兩年擺工作時間唔夠多，所以想出標年重點放番喺事業，佢話：「我都唔細，出年步入27歲，想呢兩年事業搏殺期賺多啲錢，想畀屋企人好啲嘅生活。」

問到失戀DaDa有冇唔開心，佢話：「咁又冇，我幾開心，仲鬆咗一口氣，咁樣先係自己。」DaDa唔心急拍拖，但佢就想做高齡產婦，佢話想30歲結婚生仔，佢話：「我唔恨嫁，見到近年圈中好多人陸續結婚，但佢哋都係有咗事業先，所以我想呢兩年趁後生做晒挑戰嘅嘢。」DaDa表示好多朋友想介紹男仔畀佢，佢話：「我慣咗獨立，可能男人仲想我去照顧返佢哋。今年24號同屋企人過，25號都孤單過，反而靜靜哋諗咗好多人生規劃。」日後再擇偶，DaDa開列條件：「我想要個成熟啲男朋友，幫我話到事嘅男人，佢都要好錫我屋企人，同教到我嘢。」

大後日就係2016年，DaDa先祝大家新一年充滿歡樂，佢寄望出年會更好，DaDa深信節日穿紅衣添旺氣，佢日前喺中環接受本報專訪時，特別挑選性感紅裙晒事業線，強烈顯示明年要喺事業上再衝刺。

場地提供：FOVEA