街市買平餸 專攻中間位

蘋果日報 2010/02/24 00:00


成日都話買東西要格價,但怎樣才算最抵?大埔區議員黃碧嬌就話唔係價錢最平就叫至抵,而係在同一類食品中,至靚質素嗰款中格到最平才算食得至平至正。單靠自己不免會勢孤力弱,最好同成班師奶兵團交流意見,先搵出真正平靚正貨。

記者:林佩婷
攝影:梁細權
Model:Chichi
一個柚的學問
新年辦年貨、煮團年飯講意頭,有時價錢貴點都要被迫接受。新年過後無理由再捱貴貨,就以一個普通的沙田柚為例,黃議員都認真地下了工夫,鑽研出一套柚之學問。「普通街賣的沙田柚約$10至$16,聞落無咩味、食落無咁正。咁多柚當中,我研究過最香最好味至正宗就係梅州興寧出產嘅柚。呢個柚成本約$20,元朗賣$28、大埔南盛街賣約$33、旺角賣$48,早排喺年宵我哋直接從當地入口,賣$25。」簡單一個柚都可以格勻港九,不能不佩服。
過年另一陷阱就是盆菜,好多家庭都會外賣盆菜作團年或開年飯,不少食肆更會鬥平招徠,「有啲酒樓賣得超平,但原來個盆細咗啲啲,底部個層隔又高咗啲啲,放喺裏面嘅蘿蔔、芋頭又大嚿咗啲啲,就算平都唔抵。」要知邊間最抵食,一定要聽各方師奶的口碑。
empty
■黃議員研究過梅州興寧至香至正,記得認住這個正貨標誌。
empty
購物地各有蹺妙
太太們當然最關注柴米油鹽的價格,購物地方不外乎街市、超市、藥房等,格價過程普遍是行多幾間逐間比較,但原來每個地方都有獨特的格價竅門。「以街市為例,喺正路口嘅人流多,價錢自然稍貴,街市嘅中央檔口位處較入,自然平啲吸引客仔。同時間買多啲又平啲,我通常去街市買定一星期嘅餸,只要識儲存,自然又平又食得新鮮。又或者同其他太太夾份一齊買多啲,攤開自然又平啲。」
「至於超市,有好多買二送一優惠,其實送出嚟嘅多數就快過期,又或平時你根本唔會用到嘅,變相買貴嘢。其他就要比較埋份量先知價錢,數口差最好拎定計數機。最後就係藥房,放喺門口梗係最平貨品,當你入到去揀,畀錢時突然想起買藥膏等,嗰啲價錢一定較貴,若你無格價就去買,好容易買貴晒。好似我用開嗰隻藥膏膠布,唔同藥房最多可以相差成$20。」
empty
■大埔區孔太話去街市買餸同街坊夾份買完再攤分,平好多。
買餸小Tips
1 計數機傍身
1.黃議員用30分鐘、花$60買了烏頭、菜心、番茄、生菜、花生及番薯,比一般市價平$40,買餸時不妨帶計數機。
empty
2 份裝魚超值
2.一份份的鮮魚價錢比較抵,用鹽醃能增保鮮期。
empty
empty
3 報紙包菜
3.蔬菜買得越多越平,只要將未吃的用報紙包好放入雪櫃,可保鮮一星期。
empty
4 試食有着數
4.有些檔口為吸引客人,特設試食,那就更易作出比較。
empty
5 門口貨最平
5.藥房門口的貨品較平,成藥或藥膏價錢較浮動,買前宜先問熟人再格價。
empty
6 街市中央價抵
6.街市的路口檔人流多,物價自然高;中央檔位置較次,物價有下調空間。
empty
7 優惠裝搵笨
7.超市的買二送一優惠,贈品往往較少用到或即將過期,宜小心。
empty
師奶兵團互通消息
記得當年因為買烏頭被搵笨後,激發黃議員對搵靚貨格至最抵的決心,但區議員工作繁忙,何解仲有咁多時間去格價,原來她每次到其他區開會,也會抽空到當地店舖一遊,了解行情。不過講到幫助最大,就是跟她一起練太極的太太們。
「每次練完我哋都去飲茶,跟住就不停交流買餸行情,好似我想食乜餸、想買乜就有人提議邊度至平至靚,咁就慳番好多時間。」師奶果然勁!
empty
■買餸時多跟周圍的太太攞料,就知抵唔抵。