即使商交所主席張震遠，被傳媒撞破佢同前債主詹培忠喺寫字樓講數，都冇人會狼狽到攞黑色垃圾膠袋嚟遮掩啩，偏偏停牌超過四年嘅鈞濠集團（115），成班高層就極怕見光，開股東會之嘛，竟然搵人用垃圾膠袋封住寫字樓玻璃門。話晒係一間上市公司，有乜咁唔見得光？
鈞濠自2009年三月停牌至今，前主席曾煒麟夫婦，2002至03年間訛稱投資重慶燃氣管道項目，以虛假交易詐騙公司股東同港交所（388），因而被判入獄。
鈞濠噚日喺灣仔一商廈寫字樓開股東會，之前有小股東聲稱要踩場討回公道，呢啲咁火爆嘅場面，傳媒當然被拒諸門外。主席馬學綿開完會離開亦不發一言，專心等電梯離開，一見電梯門打開，佢急急腳走入去，點知電梯唔郁兼響鐘，佢惟有走番出嚟，為避傳媒走入同層另一個寫字樓避難。
傳媒有理冇理隔住玻璃門影佢喺入面做乜，有人就即刻搵人用幾個黑色垃圾膠袋封住玻璃門，狼狽不堪。