【同病「鴛鴦」】金燕玲確診甲型流感 蘇施黃:食乜都話唔好味
甲型流感蘇施黃金燕玲
蘇施黃日前喺fb貼咗同密友金燕玲嘅合照,不過今次唔係啲乜嘢旅遊合照,而係齊齊戴住口罩去睇醫生,蘇施黃留言話:「病了!金小姐星期五發燒102度,原來患了甲型流感,非常嚴重,星期六我開始兩聲咳,星期日輪到我發燒100.9度,今朝101.6度,兩隻病壞一齊去睇醫生!」
今日蘇施黃喺商台如常開咪,仲喺節目中段接受訪問,佢話金燕玲經檢查後確診患甲型流感及H1N1,o依家留院接受治療:「佢星期五發燒燒到102度,最大鑊佢仲要咳同頭痛,最初醫生俾佢食特敏褔,但都冇乜效,星期一仲連我都病埋發燒,不過檢查完我冇事。」
蘇施黃仲話:「今年夏天流感死2、3百人,我自己又曾經患過H1N1,知佢情況唔係咁好,所以咪覺得佢要入院,點知去養和冇床位,全部大陸人住晒,噚日真係病到軟弱無力,我一定要佢入院吊鹽水,今日就37度,但係情況好反覆,時高時低,檢驗咗一輪之後,係甲型流感及H1N1。」
阿蘇話o依家金燕玲連口腔都開始損,搞到個人好辛苦,唔單止食得清淡,仲連食乜都話唔好味,就算最鍾意嘅腐竹糖水,都話唔好味,吊完鹽水之後食吓提子包,醫生話俾個胃休息吓,相信過兩三日會好番。阿蘇放工會去醫院陪佢:「我可以喺廳,佢喺間房有個隔離嘅地方,不過我唔會過夜,費事大家攬住病,佢一向身體好,最初唔為意,以為係普通感冒,冇諗過咁大劑!」阿蘇仲估金燕玲之前返大陸做嘢,啲細菌好似上帝咁無處不在!