【新增影片】喺1988年參加港姐而入行嘅陳梅馨(現名陳明君)，雖然一直徘徊喺二、三線，但係佢都有好多觀眾識佢，事關佢嘅感情生活實在好多姿多采，惜遇人不淑，兩次戀上藝人都傻更更做了第三者。

93年，陳梅馨因為拍MV同溫兆倫撻着，當時溫與大馬富家女李美玲離異不久，但有指溫仍是人夫時已與陳梅馨一起，兩人一直keep住地下情。至96年，溫兆倫向陳梅馨追討14萬港元，甚至仲發埋禁制令，結果令原本計劃赴英留學的陳梅馨計劃告吹。當時陳梅馨向傳媒哭訴：「話晒我哋都拍咗幾年拖吖！我希望佢（溫兆倫）大人有大量，放我一馬，撤銷禁制令啦！」

當時溫兆倫仲話自己冇同過陳梅馨拍拖，大家只係普通朋友，並聲稱當日係以公司名義借錢畀陳梅馨同佢家姐應急，而唔係拍拖費，冇理由借人錢唔還云云。

陳梅馨馬上反擊，拎番當日溫兆倫寫俾自己嘅情信及相片反擊，證明兩人親密關係。結果，96年2月27日，溫兆倫在黃日華陪同下入無綫亮相《城市追擊》，推翻之前口供，承認兩人確曾相戀：「以前我唔認同佢拍過拖，係覺得咁公開晒啲私人信同私人相好肉酸，但有啲報道太唔中肯，唔到我唔講。」

溫兆倫於節目中力數陳梅馨，稱對方已另結新歡，但同時卻開始問他借錢，溫稱擔心自己會受騙，因此開公司支票來借錢予陳：「我追拍拖費係衰人？同佢去兩次日本、兩次台灣，邊次唔係我包晒全部消費，大家拍拖時邊度計得咁多？講明係借嘅錢當然要還啦！」

經此一役，溫兆倫小生形象盡毀，不少人亦對陳梅馨寄予同情。可惜陳在情路上又遇人不熟，98年接受聲稱已與金慧英分手的姜皓文追求，但原來男方根本未斷纜。陳梅馨表示自己在不知情下做了第三者，姜皓文就堅稱與金慧英手已分，可是金慧英卻爆料謂:「佢噚晚仲攬住我瞓！」再次滿城風雨。

經此二役，之後陳梅馨又自爆無端端做咗第三者，男方係半個圈中人，雖然明知對方有女朋友，但係仍未肯完全放手，佢仲話自己試過為愛情自殺：「我睇愛情睇得好重，可以為愛情放棄工作，所以我以前都試過因為感情問題而考慮過自殺。」如今陳梅馨與TB密友Michelle共同生活，再次向愛海出發，希望今次happy ending啦！