當年今日
關於我們

隔牆有耳:甘乃威有忠實fans力撐 - 李八方

蘋果日報 2009/12/25 00:00


雖然甘乃威向前助理王麗珠表示好感失敗,更加惹嚟是非纏身,但始終有一班人對甘威不離不棄,好感從未減少過;就係一班投資失利嘅雷曼投資者。
為雷曼苦主奔走
署名「一群不幸的所謂『經驗投資者』」噚日去信立法會,公開向甘威表示好感,力撐甘威雖然受到私事困擾,但仍然對苦主情況極度上心,繼續為佢哋四出奔走約見高官,大讚甘威陪佢哋捱過艱苦日子,又為佢哋疏導情緒。甘威當然開解為情所困嘅王麗珠,睇嚟甘威都算係半個情緒專家。
呢群苦主唔單止公然向甘威表示好感,仲對佢愛得不能自拔,話如果呢位極受市民愛戴嘅議員被罷免,其他議員即係與民為敵,既對甘威唔公平,亦係對苦主一大打擊,因為苦主以後仲需要甘威陪佢哋討公道,呼籲議員千祈咪踢走甘威。
雷曼苦主寵愛不減,甘威似乎逐漸走出陰霾,繼續做個勤力議員,冬至嗰日約咗渠務署官員傾上環雨水抽水站運作。