【新碟籌備大半年】創作時剛分手 黎曉陽:呢個係成長過程
分手專輯黎曉陽at 17
黎曉陽(Michael)噚晚係尖沙嘴舉行新碟發佈會,At 17、C AllStar同鄧小巧現身支持 ,講到新碟籌備咗大半年時間,Michael透露喺創作期間正值同女友分手:「專輯內唯一情歌《怕》,就係紀錄呢件事,我諗人生嘅成長痛苦都包括分手,呢個係成長過程亦都認命。」
同時發佈會上展出三幅Michael親手畫嘅畫做慈善拍賣,用嚟捐俾保護鯊魚嘅慈善機構,其中兩幅已經由任賢齊同鄭秀文投得,佢話:「兩位好好, 捐咗錢但係畀我哋再繼續拍賣。」嚟緊聖誕佢話會去睇At 17同楊千嬅嘅演唱會,明年會去台灣演出,亦都希望返加拿大探屋企人。
而忙於為聖誕舉行演唱會做準備嘅At 17,噚晚亦都抽空支持,Ellen話雖然綵排得好攰,但係都嚟支持:「我哋以前初初出道都係喺呢一種細嘅餐廳度表演,Michael係一個好好嘅創作人,所以我哋都要嚟支持。」
講到演唱會籌備,佢哋話o依家每日都綵排緊 ,Ellen話:「以前每個騷大家都會有solo時間,但今次我哋兩個會一路黐住喺台上。」林二汶仲話要去Ellen屋企過夜:「我哋要增進感情,全晚Girls Talk。」二汶又透露希望開騷前一、兩日齊齊去做Spa放鬆心情。
更多娛聞,喺晒《娛果》
http://fb.com/appledailyent