家下香港興講本土味，就連fashion都最好有啲本土特色，深水埗可謂香港時裝同設計嘅重地，有唔少布藝同原材料小店，係好多創作者嘅靈感天堂，「#ddHK 設計#香港地」最近舉辦「FASCINATION STREET」，噚晚將深水埗街道變成超現實時裝舞台，有model演繹9組本地時裝設計師同品牌，唔少設計都代表咗香港嘅光陰變遷同社會願景。而呢條時尚大道除咗有長40米嘅「鏡面迷宮」，亦另有四大打咭位，包括時裝匯演3D展區等，熱受時裝嘅市民，輕易變身時尚達人。

錯過咗呢次街頭時裝盛宴？唔緊要，皆因有關服裝造型即日起至9日，會喺灣仔茂蘿街7號2樓展出。揀呢個位做展覽，都有目的㗎，就係等大眾喺這座混合咗中西風格嘅戰前舊樓中，欣賞一系列連結本地創意群體同社區歷史文化嘅時裝作品，重新發現「香港地」故事。時裝嘅嘢，大家或者識條鐵；但對於獨特嘅香港嘅特色，任何人都一定有feel有感情。