今日入伍嘅韓國樂隊CNBLUE隊長鄭容和，早前被爆涉享特權入慶熙大學，正面臨被檢方起訴，而男團2AM嘅28歲成員趙權亦被指違規獲得慶熙大學學位。

而韓國教育部今日發表聲明表示，於上月9號至13號對慶熙大學校務運營現狀進行調查，發現違反校規事件。據教育部嘅調查結果，鄭容和於缺席面試嘅情況下，卻仍以高分考入慶熙大學應用藝術專業博士課程，行為明顯違反咗相關規定，故取消其入學資格；至於趙權於2015年冇按規定舉行畢業演出嘅情況下取得碩士學校，同樣屬於違反規定，所以將會取消趙權嘅碩士學位，並要求學校對相關7名教授採取懲罰措施。

教育部相關負責人又指，鄭容和、趙權事件中嘅行為已經違反咗韓國高等教育法，如果慶熙大學唔遵守教育部嘅指示，將面臨被取消招生資格等行政處罰。

更多韓流，喺晒《娛果》
http://fb.com/appledailyent