利物浦中堅洛夫雲今年認真黑仔，佢早前喺歐聯對西維爾嗰時出現失誤，連累球隊被逼和，佢周日仲大爆自己今年6月喺家鄉克羅地亞度假時，俾迷魂黨入屋爆竊，成個過程仲好驚險下!

洛夫雲周日同傳媒講返俾人打劫嘅過程，佢話:「係，我俾人打劫。班賊入咗我間屋，偷晒我所有野。我當時咩都聽唔到，因為班賊當時放咗啲迷煙入我間屋到，搞到我被迷暈。班賊當時可以綁走埋我啲仔女，但好彩佢地冇咁做。呢個係我人生最難過嘅時候，因為我真係好驚佢地會綁走我啲仔女。」

洛夫雲透露，佢今年6月喺克羅地亞首都薩格勒布租咗間屋嚟度假，而單案發生嗰時，佢成家大細都喺間屋入面。好彩嘅係洛夫雲同家人都冇受傷，冇咗嘅只係啲現金同首飾。至於嗰班咁大膽嘅迷暈黨，佢地上個禮拜已經俾警察拉咗。