猴年首次跟戰友見面，先祝各位今年順風順水，滿懷喜樂。今年呢手牌絕對難打，但只要更用心去打，自會守得雲開見月明。全球金融市場混亂，整體策略係穩守突擊，對沖又好、避險又好，組合內須常備黃金ETF。請留意，不是金礦股，因為市冧金價漲，金股都可以跌，但ETF會大致跟足金價，近1個月多番推介SPDR黃金ETF（2840）暫漲10%，原因不贅。

過年3日歐美日大冧，市場擔心德銀資不抵債變下一間雷曼。「上次雷曼咁大鑊，今次唔敢唔救嘅！」無錯，如出事央行點都會救，但2009年來全球央行放水13萬億美金，金融體系極度膨脹，如果再爆央行仲救唔救到？央媽行到負利率一步，已證明再印錢效用已是極微，貨幣信心正逐步受動搖。近日不少論者已提倡行番金本位制度，撥亂反正，越來越多人將財產轉去Bitcoin，也是對貨幣投不信任票。德銀現牽涉於70萬億美元衍生工具，為全球投行的主要交易對手，一旦違約後果不堪切想。

亂世資金持續湧入長江基建（1038），股價逆市創新高，為黃金ETF以外另一可靠避風港。

掌握財經生活資訊，即Like「蘋果ATM」fb專頁啦！
http://fb.com/appledailyatm