雨僑喺youtube都不時上載各類短片分享心得，而且點擊率甚高，搞得有聲有色，佢自己都喺荃灣有一間studio專門用嚟拍youtube片。

而講到感情方面雨僑就同亞視出身嘅羅力威已經低調拍拖六年，而低調嘅原因就係因為大老闆蕭定一唔鍾意「二打六」羅力威，仲曾經警告過雨僑如果再同羅力威拍拖就會被「放入雪櫃」。不過任何嘢只要經過時間考驗，所有事都會清楚晒，經過六年時間，早前就曾傳出過雨僑同羅力威秘婚，雖然最後雨僑就話自己其實未嫁（新聞連結： http://bit.ly/2txj3ZJ ），不過感情都非常穩定，睇嚟婚期都指日可待。

不過今日雨僑就喺自己嘅youtube channel上載咗一首歌，雖然成條片就冇好清楚拍到羅力威個樣，但條題就寫明「《曾經太年輕》 COVER by 雨僑 PIANO by 羅力威」，而且條片全程雨僑唱咁耐羅力威個背影就出足咁耐，中間仲有影到羅力威非常模糊嘅鏡頭。

而雨僑回覆《蘋果》查詢時就話：「其實好耐無唱歌，咁就嚟派歌所以就趁機練下歌，有時佢都會彈嚟俾我唱下，而家有自己studio同in house video team, 拍下都好容易，首歌係《白色巨塔》主題曲，純粹我地都好鍾意呢隻歌，冇諗太多。」