話說，準備呢篇專欄時，我響泰國hea遊緊。我覺得周日（6日）有對馬幾啱我現時心情，睇睇第四場四班1200米泥地賽事。首先有隻「慣勝積極」，好啱我呢一類懶過隻鬼，hea到爆嘅半廢青一族，得閒就提醒吓自己：「我要努力向上，不枉諸君寄望。」

畀多少少動力，希望無咁快畀社會淘汰。所以我去玩都刨緊馬㗎，或者話，其實係跑緊馬、刨緊馬都仲掛住去玩。

「慣勝積極」除咗馬名夠積極，操練都唔弱，有刻意谷過，就係想佢保持狀態。上場轉倉初出，火喉未十足都有個第三，今轉再減咁啲肥肉，六檔遊埋二疊放又得跟又得，應該有個慢步速畀佢，係幾好跑嘅，超級丁可以省招牌。

同場仲有隻馬叫做「同歡樂」，都夠晒融情入境，響香港一樣可以歡樂。血統有唔少泥地成份嘅佢，今仗有望操足兼有磅減下殺入嚟。至於隻應該會熱熱哋嘅「協力神駒」同上回醒醒哋嘅「常山耆寶」，大家啱胃口都不妨睇睇。