臨盆在即嘅謝安琪（Kay）噚晚照出街食飯，問有冇分享心得畀首次懷孕嘅吳若希（Jinny）？Kay喺電話表示：「其實乜都傾，因為好耐冇見，都好難約到呀！因為Jinny要特登澳門返嚟，我哋食飯傾偈講吓笑，幾開心呀，我冇乜話點分享心得呀！唏，邊有咁叻呀！」

原來三人係同一個化妝師，咁啱化妝師同時大肚，所以造就咗呢餐飯聚，Kay話：「總之好難得，我哋兩個同廷鏗都係同一個化妝師，覺得呢件事好有緣份，好有紀念價值好難得，我哋就任性少少，個肚籮咁大都出嚟食餐飯，平日我都成日笑廷鏗，因為佢都好擦得，我平日笑佢係穩陣派，行得好穩，下盤好隱陣躉位勁，噚日對住我哋幾個，佢感覺好纖瘦，噚日係好愉快一晚。最近好多BB仔出世，我衷心祝各位媽媽生產順利，BB仔健康快樂，最近好多喜事，我好開心！」

Kay嘅預產期喺本月尾，問到佢o依家身體情況？Kay表示：「我ok呀，最近情況好好，仲喺屋企行嚟行去囉，哈哈哈！其實所有嘢準備好晒，我心情都準備好晒，當然越嚟越近，少少緊張，但好開心囉，可能我之前生過第一個小朋友，所以好多嘢都淡定啲，好多嘢準備嘅時候都好輕鬆，食嘢瞓覺休息各樣都好好，冇乜話腰骨痛，純粹就係體重飆升好多，醫生話合符標準囉，所以成個過程都係好開心嘅。」