孫柏文記得上世紀90年代，喺中學圖書館細讀《經濟學人》雜誌（唔好誤會我乖，我嗰日被罰留堂）。睇到一篇講日本經濟嘅文。

當年，日本央行已經將利息大幅降下，去推動經濟。不過《經濟學人》篇文就話，咁做係本末倒置，因將債務負擔減輕，只會令啲應該執笠嘅企業，成為喪屍般，令連健康嘅企業，都會因出現產能過剩、割喉競爭下，染喪屍病毒。

舊年，全球央行加息嘅加息，縮表嘅縮表，係威係勢。令投資者醒覺，知道好多喪屍企業，應該再借唔到錢，市場要來一次reset。港股、美股，喺舊年年尾大插插。

點知到12月，加息聲最響嘅聯儲局，佢嘅局長居然玩180度飄移。一嘢變鴿派。令美股出現多年來最勁嘅一次反彈。好啦，來到三月尾，上週四花旗國，聯儲局局長再放鴿下，美股喺禮拜五到跌到趴街。令港股今日都跌近600點。

數週前，歐央行話再玩印鈔，都見股市跌，當時我話過情況不妙。估唔到聯儲局加入合唱，都係咁。事到如今，當歷史最準嘅「經濟衰退前瞻指標」，即花旗國國債孳息曲線倒掛，揸長債回報息率低過短債。各國各地擁過剩產能嘅上市公司，除非央行真係郁手印鈔。如果唔係有排跌。

我相信，未正式落實縮表完結日嘅聯儲局，應該好快行出來正式宣佈幾時唔再縮。而今年息口走勢，亦好快會有佢哋指導，到時希望個市會有番啲升市動力。而喺佢哋有呢啲動作前，要非常小心。

不過就算「加大力度」，再玩印鈔，結果都前車可鑑。日本之後啲喪屍企業，將日本所有資產類別（除一定會還嘅國債外）咬到一身殘。唔通真係永無重返正常、合邏輯、冇喪屍嘅世界？

孫柏文

-----------------------------
《蘋果動新聞》訂閱新世代，4月開始免費訂閱，現在接受登記！
http://bit.ly/2Ja3IXw
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI