食之味：大坑踎大牌檔
同關智斌齊歎肉餅

蘋果日報 2007/04/20 00:00

劉德華被內地女粉絲楊麗娟苦纏，好多人覺得楊女太瘋癲。其實調轉頭諗，楊女長住內地，同劉華天各一方，唔似得香港粉絲近水樓台，行吓街都有機會撞到明星，見得多先唔稀罕。好似港島大坑區，山上豪宅零舍多藝人住，帶旺區內幾間平民食店長期星光熠熠，街坊得閒落街飲奶茶，隨時見到粒星喺隔籬咬豬扒，去演唱會坐第一行都冇咁近呀！

記者：劉嘉蕙　
攝影：陳偉強，陳盛臣
Model：Tobey、Eric
蒸肉餅食完唔口渴
民聲冰室開舖50年，明星食客個List長到事頭婆都記唔到！「Kenny（關智斌）成日嚟食肉餅；Eason成日嚟食豬扒包，仲會同我搭膊頭傾偈，問我開舖辛唔辛苦，好親切；Leon就會叫助手嚟買豬扒包，次次一買5、6個，聽講佢自己可以食2、3個。」遲啲暑假民聲會裝修，粉絲心掛掛可以轉入香港仔分店食招牌豬扒。
事頭婆提醒各位，去民聲食飯兼睇星可以，但記住要尊重班星嘅私人空間，學袁靚靚喺金像獎頒獎典禮入面咁講，遠距離尊重代表無限量支持呀！
捽手肉餅$29（套餐連白飯、菜及湯）
話說Kenny上個禮拜俾人影到同舊女友見面捽手，當時佢就喺民聲食緊呢個肉餅。肉餅大大份，啖啖肉不覺肥膩，食完唔會口渴，加上白飯任裝，三十蚊有找好抵食，記者見到幾乎枱枱都叫！
empty
天王豬扒包$13
事頭婆話豬扒用人手打至鬆化，不加味精，全部真材實料，食落又嫩又香。唔鍾意食包可以跟麵，$22有一丁麵加兩塊巨型豬扒，Eason每次必點，舊年袁靚靚大緊肚，Chilam仲親自買俾佢食㖭！
empty
泰式骨$29
層層叠泰式骨賣相見巧手，食落異常香脆，肉質鬆軟唔會黐牙。
empty
明星客：
陳奕迅、黎明、張智霖、袁詠儀、劉浩龍、少爺占、何韻詩
empty
empty
A.地址：大坑浣紗街16號地下（25775455）
營業時間：7am-10:30pm
empty
獨門醬汁撈麵最煞食
鐵皮車仔腸粉檔順興，舊年停開3個月，不少粉絲日日望門興歎，於是本來喺馬來西亞開茶餐廳嘅Fanny專程飛返嚟接阿哥棒，一家人再次披甲上陣服務街坊，仲加入中西飯款同茶餐。Fanny話：「政府隨時收番車仔牌，所以今勻捲土重來，特登喺隔籬租多個街舖，希望以後長開長有。」
車仔麵（每個餸$4、粉麵底$4個）
馳名遠近車仔麵，求其一個餸都咁入味，內臟如豬大腸同牛雜整得好亁淨。Fanny話自家醬汁撈麵最正，但應食客要求加湯又得，麵底轉腸粉亦得，街頭口味加街頭智慧，才是老店不敗之謎。
empty
腸粉$1/條
晨早食腸粉做早餐最夠風味，近年街上淨腸粉好似越來越少，好食的更罕有，$1條腸粉，即係聽價錢都令人感動，今時今日市面上幾時見有嘢仲賣$1？
empty
明星客：
郭晉安、側田、歐倩怡、梁思浩、方中信、黃秋生、陳小春
empty
empty
B.地址：大坑安庶庇街24號地下（25766577）
營業時間：6:30am-5:30pm
empty
肉碎炒飯惹味少辣
大坑區內茶餐廳多，地方風味菜反而少，好似金龍泰，地道又平更難得。老闆阿細喺泰國住咗幾十年，炒飯炒菜夠鑊氣，街坊同記者話豬頸肉炒飯最正。舖仔細細，四式泰式調味料一樣有齊，𠵱家好多高檔泰菜都冇跟得咁足，呢啲咪叫誠意囉！
香葉辣椒肉碎飯$27
也許Kenny真係好靚仔，因為問間間舖，個個女夥計都記得Kenny幫襯過，仲記得佢鍾意食乜。呢個飯可轉炒飯底，肉碎非常香口，少少辣，多多香。加支汽水，晚晚食都唔厭。
empty
日本青魚（時價）
確定係日本青魚，老闆話加自製辣椒魚露，有秋刀魚泰食之感，跟平日食開泰式燒魚不同。
empty
明星客：
徐濠縈、李心潔、關智斌
empty
C.地址：大坑銅鑼灣道96A舖（25785932）
營業時間：12nn-12mn（星期三休息）
empty
魚片粥鮮甜有情人味
有30幾年歷史嘅康記，因為呢度啲粥夠軟綿又有人情味，唔似連鎖粥店有種機械感，聽街坊講幫襯咗好多年，睇住啲細路仔長大，令人覺得好熟悉同溫暖。
魚片肉片粥$13
鯇魚片同肉片大大件，令粥底加倍鮮甜。粥份量又夠大碗，望落已經有種飽滿幸福感。
empty
明星客：
盧巧音
empty
D.地址：銅鑼灣大坑京街11號地下（28084518）
營業時間：6am-12mn
empty
攪蛋快樂飯加倍開心
快樂廚房前身係烹飪教室，上過電視，黎瑞恩同向海嵐都有上過堂。環境企理，菜式係家常食材，加上老闆心思研製，好有HomemadeFeel。
快樂飯$35
招牌快樂飯，有腸、豬扒同雞翼，老闆話好味貼士係飯上一隻半生熟蛋，下面隱藏粟米，食前篤開佢攪兩攪，加倍快樂及美味。
empty
明星客：
鍾鎮濤、雷宇揚、藍潔瑛
empty
E.地址：銅鑼灣道144號地下34282633）
營業時間：12nn-10:30pm（星期三休息）
empty
地中海豬扒米醬汁香濃
炳記老字號，街邊鐵皮小屋十足大牌檔格局，但係任點嘅高級日本麻油同泰式辣椒魚露絕對係揼本之作，難怪幾時去都要搭枱。
影后豬扒米$20
林嘉欣俾雜誌影過喺街邊食豬扒麵，佢踎街都要食，因為呢度嘅豬扒個地中海醬汁香濃帶微辣，豬扒切好一條條跟麵，女仔當街食唔怕失儀。
empty
明星客：
林嘉欣、林姍姍、芝ci菇bi、盧巧音
empty
G.地址：大坑施弼街5號側（25773117）
營業時間：7:00am至6:00pm（星期日休息）
empty
鹽焗雞無添加
喺大坑大一讀設計嘅男ModelEric爆料，話以前成日見梁漢文喺轉角永興閣食飯。其實永興閣最多的士佬撐，蒸餸同小菜最受歡迎，的士佬話好食，好少落錯單，所以呢度係識食之選。
鹽焗雞套餐$30
鹽焗雞一定用新鮮雞整，例湯不加味精，重點係白飯夠大碗，食完一定夠飽。
empty
明星客：
林敏驄夫婦，梁漢文
empty
H.地址：銅鑼灣道110至114號地下（25710560）
營業時間：6am-11pm
empty
大坑點去？
天后地鐵站A出口，於皇仁書院旁轉入銅鑼灣道，步行約5分鐘。
empty
empty
■大坑靜中帶旺，車位又多，去食飯隨時見到明星。
empty
■大坑多車房同車位，吸引潮人明星揸車覓食。
empty
■大坑潮人多，電影《傷城》舊年亦在此取景，條街金城武都跑過。