千呼萬喚始出來，玖龍紙業董事長兼創辦人張茵成為中國女首富後，昨日首次在本港公開場合開腔回應。20多年前以3萬元起家，目前身家逾270億元嘅「紙品女王」張茵，以帶有山東口音嘅國語、不慍不火嘅語調話：「我已等了（做首富）10年了！」
此話何來呢？噚日，有行家問女王覺唔覺得外資喺內地搞紙業，比內地民企有優勢呢？女王答，其實內地有好多優秀民企，造紙嘅國企仲多，佢只係睇準市場需要，全力而為啫。佢又話，之前有民企老總做首富，點解我唔可以？

只係紙上富貴

其實張茵揸住3粒星香港身份證，既然係外資，點解佢可以做中國首富呢？據女王話，佢喺廣東紹關出世，6歲去咗東北，20多歲又返廣東，再嚟香港創業掘第一桶金，所以咪又有香港身份證，又係中國居民，仲可以做中國富豪囉！
對於有口痕友話中國財富榜係富豪嘅「原罪」，女王話「冇有怕」，自從玖龍上市後，要搵集團嘅資料，佢阻唔到，亦管唔着，其他人要查要睇，悉隨尊便。佢仲自爆佢係「納稅大戶」！華華都係第一次聽內地富豪咁樣話自己，一招「真金不怕洪爐火」，厲害。
張茵仲話，做女首富有利有弊。好處係佢身家咁升，即係代表玖紙股價係咁升，令大家感到玖龍嘅努力；唔好嘅係叫得女首富，難免被人指指點點。不過，佢話呢啲只係紙上富貴，成日都會變，佢自己唔係睇得好重！
對於喺男性主導嘅中國商場打滾咁耐，覺唔覺得要付出更多努力先可以成功呢？女王話，喺商場上鬥嘅唔係力氣，而係智慧，所以喺商場上男女係平等嘅，反而女性可以攞到更多尊重呢！
[email protected]