股市自去年八月以來，興旺至今，踏入一一年一月，繼續炒上，不少分析師估計恒指會上升到二萬八千點，相當於恒指成份股嘅市盈率十五倍喎。最近啲板塊輪流追落後，個幾星期前有分析師唱好航運股，就係最佳追落後嘅例子。
但睇多啲數據，航運股未必真係好正喎，彭博喺一月十日有專文講最新乾散貨輪嘅船租，可能會跌至二○○二年以來新低點，一隻一千呎長嘅Capesize輪，專運礦沙嘅，你估今年嘅平均日租會跌到幾多錢呢？彭博調查八個基金經理及分析師：得到嘅中位估計數字係二萬二千美元；上一次船租低到咁殘之時，中國GDP總值只有現時GDP嘅四分之一──主要原因係供應過多，今年一共有二百隻Capesize新船交貨，一隻接一隻咁樣在海上排隊，連綿35英里長，將全球乾散貨輪運載能力提高18%，市場根本無法消化。點解咁多隻新船落海？2007、2008年好景之時，平均船租每日升到十一萬一千美元，最高升到二十三萬三千九百八十八美元（○八年六月），之後因金融海嘯，跌到最低每日二千三百一十六美元先至由谷底反彈，但好景時簽下嘅新訂單今年交貨嘞，船東有排煩。
船隻買賣，租賃經紀係一個小圈子，來來去去都係嗰班人，佢哋嘅消息十分靈通。去年六月，一隻二手貨輪價值六千一百四十萬美元，到去年十二月跌到五千三百二十萬美元。航運市場如此多變，一啲穩打穩紮，喜歡簽下長期租約嘅船公司在好景時賺少好多，但在跌市時就有穩定利潤嘅，另外做貨櫃（集裝箱）嘅船公司又會在環球貿易增長嘅環境得益。選航運股要好識揀，並非易事，專家就話炒落後啫，散戶最好避之則吉。