當年今日
關於我們

【莎拉密語】蔡神仙成堆寶藏 等我幫大家發掘

蘋果日報 2018/09/25 21:10

蔡約翰莎拉密語鄉村瑰寶

蔡約翰向來靠質新馬食糊,今季跑過五次賽事,出馬只八匹,其中有六駒是初出馬,但全部無功而還,似乎有別以往作風,究竟係馬匹質素有問題,還是因部份馬要往從化訓練,仍未適應環境?上述問題都值得深入研究。
要知道原因,先要拆解六匹初出馬底蘊,「紅運戰士」、「邊個邊個」在外國贏一哩及於1800米上名,擺明係長途馬,初出跑1200米及1400米均嫌短。
「大掌櫃」、「請跟我來」及「好利運來」全部試閘都無段好睇,血統清一色中距離以上才合,要實戰跑起狀態。
剩下「鄉村瑰寶」最似樣,上季雷神兩課試閘已經矚目,今季潘頓接手更視如珠如寶,上仗初出,直路上左碰右碰。
這對於年僅三歲馬來講,出賽經驗未夠,要重新修正再上難度極高,拉士100米才認真騎兩步,即如飛撲上跑第四。
上周五(21日)馬房再安排試閘,面對「天下為攻」及「紅衣醒神」等短途馬王,輕鬆跟跑走入第四名,姿態充份顯示具備超新星條件,明晚(26日)C加3欄抽2檔起步,加上繼續有潘頓之助,難尋敗理。
對手方面,唯一睇唔透係方廐初出馬「肥仔威威」,上季拍賣馬兩課閘都係威係勢,早前專登搭車到快活谷實地試閘,兜大彎蝕位甚多,直路仍可逢馬過馬,但方廐初出馬即勝成功率極低,唯有視作不明分子。