議員博曝光爭選票本來無可厚非,但有網民發現,近日喺街頭出現大量立法會議員梁美芬「成功爭取」施政報告「落實有關老人的措施」嘅海報,質疑鼠王芬身為大律師兼城大法律系副教授竟然知法犯法,亂貼街招,可能因為錢多唔怕罰款1,500元。但鼠王芬就堅稱,唔關佢事。
網民影低呢批海報嘅相噚日擺上討論區,拍攝地點疑似深水埗,路邊、燈柱、電箱、郵箱等公眾地方都貼晒宣揚鼠王芬豐功偉績嘅海報。根據《公眾衞生及市政條例》第132章第104A條,未經准許而展示招貼或海報,或《廢物處置條例》第354章第16A(1)條,「非法擺放廢物」,兩者都可以罰款1,500元。