韓國電影市場好繁榮，亦容納到唔同嘅片種，除咗喜劇受歡迎外，浪漫愛情電影都令觀眾好受落，根據韓國電影網站就盤點咗歷年嚟韓國浪漫愛情電影，並統計佢哋嘅評分，就分數嘅高低嚴選十部最好嘅浪漫愛情電影，不過當中好多都係2000年初時期嘅作品，近呢幾年都冇電影得到高分數。

當中由郭在容執導、孫藝珍、曹承佑同趙寅成主演嘅《假如愛有天意》就得分最高，以9.33嘅評分(10分為滿分)成為浪漫愛情電影之冠。呢部電影創作靈感嚟自一本韓國小說《Rainfall》，講述了大學生無意中發現母親留下嘅日記，於是就憑日記重溫母親嘅初戀，電影喺2003年於韓國上映，除咗本土受歡迎外，其他亞洲地方亦好受歡迎，孫藝珍仲因而為人認識。

至於第二位就係於2005年上映，由金荷娜、河智苑、劉智泰主演嘅《同感》，電影係講金荷娜意外發現一個古老對話機，並同唔同時空嘅劉智泰對話，兩人仲因經常談心而談出感情，電影當年成為該年度嘅十大賣座片嘅第七名，網站評分為9.06分。而之後電影仲拍成港版《愛，斷了線》，由梁詠琪、朱孝天主演。

第三名係《你是我的命運》，此片由全度妍、黃正民主演，全度妍飾演一名為咗逃避丈夫虐待嘅一名性工作者，佢一次偶然機會下遇到黃正民，黃正民對全度妍一往情深，更將全部人生奉獻畀全度妍，情節十分感人。電影於2005年上映，網站評分為9.06分。

而排第四位至第十位就分別為：
第四位：《白蘭》主演張栢芝、崔岷植等，網站評分9.04分。
第五位：《禮物》主演李英愛、李政宰等，網站評分9.02分。
第六位：《情約笨豬跳》主演李秉憲、李恩宙等，網站評分9分。
第七位：《明日戀愛預告》主演李政宰、張真英等，網站評分8.97分。
第八位：《向左愛向右愛》主演車太鉉、孫藝珍、李恩宙等，網站評分8.95分。
第九位：《痛愛ing》主演金來沅、林秀晶等，網站評分8.87分。
第十位：《公路電影》主演黃正民等，網站評分8.85分。