相信打工仔都會明白，乜嘢係old seafood心態？即係嗰種成日吹噓自己以前幾咁叻、幾咁巴閉嘅人，估唔到原來唔單止一個人會變old seafood，一個政府都可以變old seafood。

是咁的，外交部駐港特派員公署喺Facebook出po，話外國有網民質疑中國除咗四大發明外，冇嘢值得驕傲，點知就有中國網民反駁，其實古代中國好多「高科技」，例如水晶杯、越王勾踐把劍、牙刷等等，係「包羅萬象又讓人拍案叫絕」。唔知係咪因為華為事件，令「厲害了，我的國！」覺得係因為創新而受打壓，所以個po同時指，「我們為老祖宗的智慧點讚的同時，亦需時刻牢記：創新是一個民族進步的靈魂，是一個國家興旺發達的不竭動力。在這方面，我們任重道遠！」，而公署甚至整咗條片去介紹古代中國嘅「高科技」，認真一絲不苟！

其實八方本身都覺得呢啲古代「高科技」係好勁，相信有緣喺博物館見到嘅話，都會「哇」一聲，但有冇必要拎番啲幾百年、甚至成千年前嘅嘢出嚟自high，相信大家都有唔同睇法！一唔係就好似上年咁，自high中國「新四大發明」，但其實冇一樣真係中國「發明」，可能反而更令人有「共鳴」。