不過，對於穩陣派投資者嚟講，家陣係好日子，因為銀行差唔多隔日就有新優惠推出，而且「高息戰」由定存蔓延到去活期存款。好似去大眾銀行新開活期存款戶口，10萬蚊樓下有0.2厘息，10萬銀以上就有0.15厘息，但以日息計算，當日最低結餘3000蚊或以上，嗰日先至計息，比起唔少銀行嘅1個月定存仲高息。
其實唔使等銀行嘅推廣先至有優惠，熟客嘅定存息率通常都有得傾，可以比牌價高，而且間間分行唔同。熟客唔一定要好似敏妮媽咪咁，得閒冇事都落銀行，同相熟經理或者teller打牙骱先叫熟客。開戶一段時期，或者幫襯咗其他銀行服務，做定存時，開口同銀行問吓有冇優惠啲嘅息率，識做生意嘅銀行，通常都有啲驚喜。之前有銀行推1個月銀行定存有1厘息，但限期只有1個月，而且只限30萬蚊，其實老早已經有銀行向熟客提供3個月定存1厘息優惠。
講開銀行推優惠，其實唔係香港銀行先至識做，好似喺深圳嘅建行就推出91日人仔定存優惠，利率高達3.7厘，據講吸引唔少經常往返中港兩地嘅港人去開戶。
溫敏妮
http://wanmanli.com/blogs/