平安夜未到，警隊幾位高層已經收到大禮提早過boxingday，警隊一哥鄧竟成好識做，長假期前公佈升職名單，高級助理處長曾偉雄出年1月7號升任副處長（管理），助理處長古樹鴻升做高級助理處長，兩名總警司顧履勤（AustinKerrigan）同孫貴良同時升為助理處長。
曾偉雄升職接替即將榮休嘅副處長馮兆元，曾有機再上層樓，如無意外會係下任一哥，佢同另一高級助理處長李家超競爭應告一段落。警隊老友同八方講，其實早喺許淇安做處長年代，曾偉雄已被視為「隔代一哥」。許sir做毒品調查科阿頭時，曾偉雄被派做卧底屢破大案，兩人情同師徒，曾更有「小許淇安」之稱。

曾偉雄好彩，唔使三年又三年，許sir立功升職，曾偉雄亦平步青雲並獲重點栽培，幾年前做O記阿頭時瞓身追緝「賊王」季炳雄備受賞識，據講佢喺警隊內人緣甚好，受愛戴程度媲美鄧竟成。
升職榜上較多人認識嘅古樹鴻，02年元旦，少年練智偉喺尖沙嘴同警員互摑，事後古樹鴻指當時少年係同阿sir講"HappyNewYear"。另外兩位紮職警官都有來頭，05年7歲嘅賢仔喺梨木樹邨俾人斬傷，當時係荃灣警區指揮官嘅顧履勤直斥兇徒係「欺負小孩的懦夫」。
孫貴良曾擔任警察機動部隊校長，05年底世貿會議前，佢負責訓練防暴隊對付韓農，雖則俾韓農衝破防線直攻會展，但冇影響仕途，獲委以重任負責出年奧運馬術賽保安。孫貴良做事愛親力親為，做大埔區指揮官時曾微服出巡去街市收料，睇吓有冇黑社會收陀地。
今次升官名單最有睇頭嘅唔係榜上有名嘅人，而係暫時未上榜嘅兩位「明日之星」，一位係總警司盧偉聰，另一個係九龍城警區指揮官劉業成。前者被指係前一哥李明逵「頭馬」，後者則喺05年7.1大遊行前撐李明逵，叫遊行人士唔好嗌高官落台等煽動性口號；警隊中人指，佢哋都係「隔代一哥」之選，至於邊個人跑出，就要睇吓誰人先獲保送去英國國防學院進修，事關該處係一哥搖籃，鍍金後前途無可限量。