國中控股（202）周四急升之後，噚日停牌，公布正洽商出售若干於上海及長沙之物業權益，倘落實會構成非常重大出售事項，另該公司亦正進行兩項關於若干在中國之供水及物業投資。
呢間公司由內地富豪張揚持有，張揚可以榮登《福布斯》內地富豪榜，照計應該有咁上下財力，但係睇返公司盤數，完全係另一回事。集團上年度虧損1.08億元，而且財政狀況似乎麻麻，現金只得2200萬元左右，但係要1年內償還嘅債就高達2.2億元，係手頭現金嘅10倍。
公司財況雖然令人頭痕，但其實公司資產相當豐厚，資產合共14億幾，扣除總負債4億幾，淨資產接近10億元（相對於公司市值2.1億，折讓達8成），故此出售國內資產套現還債，可以講係最合理的出路。