關楚耀今日去到澳門一間泰國餐廳開幕，最近佢被影到同女友喺夜店好親密，問佢係咪蜜運中?佢就笑笑口話:「今日專誠嚟賀少年食神Michael，好開心好高興。我喺餐飲生意上都向佢取經，3個月前係台灣開第一間餐廳，覺得佢好有生意頭腦。」

問可會帶女友來試?關楚耀話:「會o架，同佢都係朋友。」女友係韓國人鐘唔鐘意食泰國嘢?佢話:「佢都鐘意食辣嘢，好似我以前好少食泡菜，o依家都慢慢試，試下唔同地方口味。」

問到佢台灣間餐廳係邊類型?關楚耀話:「叫MuseeKitchen&BAR，食西餐同酒吧，好鐘意台灣呢個地方，覺得香港食飯好趕，台灣飲食好享受好enjoy，係一個新嘗試，比自己減壓，有個理由去下台灣。」會否喺酒吧開騷?佢話:「只係開咗3個月，自己鍾意煮嘢多啲，，3、4個月後希望有自己recipe，聖誕同除夕都fullhouse，歌迷都搵我訂位。」

佢又透露餐廳投資6位數，問女友有冇入股?佢話冇，咁會同女友煮飯仔?佢話:「自己都鐘意煮嘢，成日都會煮下，不過媽咪妹妹爸爸煮得多啲。」佢又直言同女友拍咗幾個月拖好開心，又指近半年成日都去台灣，半年飛咗20次。

講到志偉組嘅新公司AllInOne被指帳目混亂，閣關楚耀係咪簽呢間公司?佢話:「係，希望今年新公司有新突破，喺電影圈發展。」會少啲唱歌?佢話:「唔會嘅，兩樣嘢都繼續做，本身係音樂出身，都鍾意音樂。」間公司帳目混亂?佢話:「合作咗2個月，數目都好清晰，有信心。」