力寶（226）股價慢熱，但資產質素靚到爆，冷灶絕對燒得過。力寶半年升咗64%，1年累計，仲係講緊跌35%，實情好落後。力寶最新NAV9.30元，現價（2.57元）折讓高達72%，已經吸引到痹。
仲要咁睇，力寶旗下力寶華潤（156）07年時實物分派香港華人（655），旗艦力寶，家陣係直控力華及華人股權。亦即係話，力寶可以直接分享到兩個仔仔嘅NAV增值及獲利。而家陣力寶透過呢兩家公司，喺中、港、澳及星洲揸咗唔少優質投資物業或者靚地，加埋呢啲地區，亦應該係最快跳出金融海嘯影響，對力寶升值潛力，睇高幾線。
再講，力寶最新手頭現金14.6億銀，銀彈相當充裕，能攻能守。冷吼力寶，博集團上番1年前高位4蚊水位，力寶重估前嘅NAV折讓，仲係講緊高達57%，但力寶潛在回報率，已經有55%，實情抵博。

富豪產託等向上爆

富豪產業信託（1881）今年以來，大致喺1元至1.25元上上落落，收集等爆邊。富豪產託08年度（12月底止）每個基金單位合共派息0.167元，現價（1.14元）嘅息率高達14.7厘。就當09年度業績冇增長，可分派金額只係維持到08年度水位，呢個息率回報，睇到都流口水。再講，富豪產託最近NAV2.60元，現價折讓56%，亦有唔錯折讓墊底。博富豪產託翻半番到1.71元，息率回報9.7厘，翻一番到2.28元，息率回報仍然高達7.3厘。
錢雋