走咗迪路菲奧，英超賽場再有一班新嘅「巴塞幫」。繼愛華頓簽入辛度拉美利斯後，蒙尼亞艾哈達迪亦可能會遠赴英倫闖一闖。

周二有報道話，巴塞隆拿準備將上季借去華倫西亞嘅蒙尼亞艾哈達迪賣走，批准佢可以自由同潛在買家傾轉會，希望可以從中賺取逾1,400萬歐元（約1.2億港元）。據悉，韋斯咸、修咸頓及水晶宮都諗住爭購呢位21歲西班牙翼鋒，當然仲有德甲嘅史浩克04同俄超勁旅辛尼特，但蒙尼亞就似乎唔想過俄羅斯。不過，呢班買家都仲同巴塞講緊價，希望喺800至1,000萬歐元之間就有交收，且看之後事態發展會點，巴塞可否賺到佢哋心目中嘅理想價。

蒙尼亞喺2014年從B隊晉升上一隊，西甲處子作對艾爾切就取得入球，可惜巴塞競爭力太大，令佢一直無法出頭，上季更被外借至華倫西亞，各項賽事上陣35場入七球。