任達華太太琦琦今日喺九龍灣出席購物節活動，佢仲特別為活動設計咗攪拌器嘅花紋，佢話設計概念係來自喜愛大自然嘅原素放入去，所以用咗藍天白雲配以紅花嘅圖案。琦琦話本身都喜歡設計，近年亦都有研究珠寶設計，籌備咗一年半嘅自家品牌亦將於七月面世。

琦琦透露，目前嘅計劃係先做網上生意，首批珠寶共一百款，為了吸引多層面客戶，佢會搵囡囡做模特兒，而且老公任達華都俾咗好多意見，佢話:「出動全家幫忙，華哥品味有番咁上下，佢俾咗好多意見。」而且任達華對佢嘅設計都很滿意，收到很多讚賞，佢話:「佢有讚呀，佢最近去馬來西亞做嘢都有帶我嘅設計，朋友們都好支持，一早已經訂咗好多款。」