【新增內容】
日本毒男粉絲一向猖狂，不論當紅抑或地下偶像，藝能界已多次傳出藝人嘅人身安全受到威脅消息。日本偶像組合櫸坂46噚晚喺千葉幕張舉行嘅握手會上，就發生有男粉絲於場內燃點信號彈引起恐慌，幸得現場保安及時制止，涉事男子被警方帶署調查，在其身上搜出藏有一把生果刀，更有指佢目標就係今日滿16歲嘅主將平手友梨奈，如果進一步行動後果定不堪設想。

現場消息指，被捕無業男子阿部凌平現年24歲，於晚上7時40分被發現在場內燃點起信號彈，佢係憑櫸坂46今年4月發行單曲《不協和音》內嘅握手券入場，並成功通過金屬探測器準備向目標埋身，阿部凌平當時更排在成員柿崎芽實與平手友梨奈之人龍，事發時場面緊張，大會一度要將活動叫停，當證實冇人受傷及把男子帶走後，握手會繼續舉行，

櫸坂由平手友梨奈為首，出道一年推出四支單曲都登上銷量榜冠軍，早前嘅暢銷單曲《不協和音》累積75萬張，成為2017上半年最暢銷單曲嘅第4位，7月19日更有首張專輯《潔白物不想被沾污》上架。

至於今日原定於同場地舉行櫸坂握手會，大會表示會加派保安到場駐守，而平手友梨奈等共五位成員今日決定不會參加握手會。