日本NHK電視台今日公佈下月除夕晚舉行嘅《第67屆紅白歌唱大賽》入圍名單，今日更安排一眾初出場單位開記者會。隨住SMAP解散，同門組合KinKi Kids今年起首次打入盛會，樂壇天后宇多田光今年復出後，亦係入行首次亮相《紅白》，將以海外直播形式進行。

至於96年出道嘅二人女子組合PUFFY，原來當紅時亦無緣登上《紅白》舞台，趁住今年係出道20周年，PUFFY終於一嘗心願代表紅組出場。除咗PIKO太郎會以特別嘉賓形式出場唱出《PPAP》外，出道未夠一年嘅女子組合欅坂46，處女單曲《沉默的大多數》首周已大賣26.2萬張，可算係大熱姿態入圍，而THE YELLOW MONKEY、RADIO FISH、桐谷健太、同埋憑《你的名字。》歌曲進一步走紅嘅RADWIMPS都榜上有名，共有10組首次登場之歌唱單位。有喜又有愁，騎呢組合金爆終於被Out，而66歲毒舌女星和田秋子雖然擁有連續30年出戰紀錄，不過去年被選為「最唔想喺紅白見到嘅歌手」第一位，今年和田秋子亦終告落選。