韓劇《未來的選擇》女星尹恩惠早前喺內地節目《女神新裝》時因為被網民踢爆佢抄衫而惹嚟一身蟻,喺韓國嘅形象仲插晒水,搞到佢都忍唔住要閉關一段時間避風頭。
事隔3個月,尹恩惠今日就喺抄襲是非後喺韓國首次現身公開場合,出席代言品牌嘅活動,著住簡單黑色連身裙出場嘅佢,一見到在場傳媒就即時90度鞠躬,仲為早前嘅抄襲是非公開道歉話:「引起爭議對唔住,以後我會更加努力,希望大家好好支持我。」,而過去向來都係開心果嘅佢,今日就顯得平實得多,擺出一個韓國傳媒形容為「難以捉摸」嘅表情之外,仲全程只係微微笑,似係仲為抄襲一事而擔心。
同場仲有澳洲索模MirandaKerre,尹恩惠亦有同佢合照。