十年前，大批負資產7.1上街，十年後，不少人卻因為超高樓價苦不堪言，青年拒當樓奴運動成員唐耀強是其中之一。「大地產商透過房地產壓制小市民嘅遊戲規則，十年嚟冇變過，只係十年前冧市，十年後係幻象嘅高峯」。負資產噩夢隨時歷史重演，80後的他堅持上街，但就堅拒上車！
「03年嘅7.1，我仲讀緊中六，乜嘢都唔識，嗰年冇𠵱家咁多網上組織，我記得自己一個人去，反對23條立法，行行吓，先聽到話有50萬人咁多，好震撼。」

03年7.1是重要啟蒙

「六四嗰年百萬人上街，我先至4歲，印象模糊，03年7.1於我而言係好重要嘅啟蒙」。成功阻止23條立法、05年董建華下台讓他看到人民的力量。
過去十年，唐耀強從不缺席7.1遊行，「最初嗰幾年只係跟吓大隊，到06、07年開始，人大咗，理念越嚟越清晰，雖然唔少人話7.1遊行嘅主題越來越模糊，但我就認為唔使設定特定議題，只要一日未有真普選、一日社會仍有唔公平唔公義，我覺得仍然需要行出嚟，用腳話畀當權者知，唔好亂嚟」。
像很多積極參與社運的青年一樣，菜園村令他認識到地產霸權的可怕，「我都叫做見識過沙士期間負資產有幾恐怖，𠵱家嘅90後，可能從未見過冧市，如果我哋呢代，好似十年前咁，又走進高樓價遊戲，引火自焚，有乜嘢意思？」