胡杏兒擔正主演嘅《我和春天有個約會》，一連五場喺上海公演，舞台劇噚晚啱啱做完最尾一場，由於外間反應熱烈，主辦單位將會食髓知味，下年1月會再度公演，3月就會巡演，不過飾演女主角小蝶嘅杏兒就搵楊怡頂上！

據知，自從胡杏兒以200萬港元接咗呢齣舞台劇後，近呢幾個月都要忙於同其他要角綵排，咁其實套劇除咗香港演員，有唔少角色都係大陸搵番嚟，所以劇組原定安排喺上海當地綵排，不過Philip太太，亦即係胡杏兒呢，就話自己唔想咁長時間見唔到老公，加上佢要爭取時間同老公密密造人……女主角開到口，話要生B喎，邊個夠膽阻撓？就係咁，全個劇組惟有遷就喺香港綵排。

而喺演出期間，胡杏兒都有唔少堅持同要求，令到劇組好頭痕。據知，劇組為咗統一角色嘅化妝同髮型，一早搵咗專人幫手，不過好有堅持同好有態度嘅胡杏兒，就堅持要搵番自己嘅stylist，諸如佢個別出心栽嘅雞冠頭，就係出自杏兒本人嘅精心「傑」作！

既然女主角要求高到一個點，劇組咪惟有忍痛易角，搵咗同樣做咗人妻嘅楊怡頂上囉！