金毛尋回犬碌落3米山坡警員愛協合力救

蘋果日報 2018/03/17 11:32

金督馳馬徑金毛尋回犬行山墮坡

一對夫婦今晨帶同愛犬金毛尋回犬，到北角金督馳馬徑行山，行至賽西湖公園對上山坡，迎面行來另一狗主拖著兩犬，其中一隻為大雪橇，三隻狗相遇，玩埋一堆不亦樂乎，惟期間金毛疑突跣腳，滾落3米下山坡，無法自行爬回路邊，主人無計無施，9時許報警求助。

警員及愛護動物協會人員接報到場，到場的4名警員先在山坡頂放下繩子，再由兩警合力拉著繩索，支撐著姓趙愛協督察游繩而下，趙攀落山坡見到金毛，當時金毛表現乖巧，趙事後表示，「佢（金毛）走埋我度，覺得佢知道我嚟救佢」，他將繩索綁在金毛身上，由警員合力將牠拉上路邊，全程約半小時，終將牠救回路面。

女狗主看見愛犬安然無恙，在牠返回路邊一刻上前迎接攬抱，更不時輕撫其頭臉，著牠「唔使緊張」，令受驚的金毛鎮定下來。金毛與女主人重逢，亦顯得份外嬌嗲，不時靠在女主人身旁，男女狗主感謝警員及愛協人員為愛犬脫險，不斷說「唔該晒阿Sir，多謝你哋，辛苦晒你哋」。

愛協發言人回應稱，人員到場後50分鐘，成功將狗隻救起，牠是一隻成年金毛狗女，沒有表面傷痕，已交回主人。發言人呼籲，若有任何動物身處危險位置，可召愛護動物協會拯救督察到場，愛協24小時免費動物拯救服務熱線為 2711 1000 。

警員拉著繩索，愛協人員游繩而下救狗。(胡恩宏攝)

金毛返回路邊一刻，女主人雙手迎接。(胡恩宏攝)

女主人與脫險的金毛尋回犬重逢，喜上眉梢。(胡恩宏攝)

(胡恩宏攝)

狗主拖著愛犬離開。(胡恩宏攝)

金毛尋回犬碌落3米山坡 警員愛協合力救