龍年將至，賀歲片嘅戲碼每下愈況，好彩由南華承辦嘅亞洲超級球會挑戰盃（即賀歲盃），都仲有啲噱頭。南華足主羅傑承前晚同求大俠爆料，話聽日返球隊報到嘅「蝙蝠俠」基士文實在太愛香港，決定同場加映《我愛香港之掛靴萬歲》，踢罷亞超盃後在港鳴金收山！
臨近歲晚，羅生前晚特別邀請一眾傳媒朋友到佢旗下嘅新K場食團年飯，摸摸吓酒杯底期間，更加有料爆。「基士文一直都好鍾意香港呢個城市，佢話我聽今次返嚟踢埋呢個亞超盃，決定會喺香港掛靴。佢話上次最後一次為南華披甲入咗球波，仲幫南華捧走足總盃，希望今次又有波入，捧埋亞超盃就好喇。」
嘩！32歲嘅文仔踢過英超、西甲、荷甲、法甲……返香港前仲幫已經同佢解約嘅白俄羅斯球隊巴迪征戰歐聯，偏偏揀效力時間最短嘅香港掛靴，香港球迷認真有面！但作為老闆嘅羅生就笑笑口話佢擦鞋︰「真係唔知點解佢咁擦鞋，仲話要着返件『IloveHK』嘅T恤入大球場掛靴！」

少林寺榮休38號球衣

事實上，文仔上年同前曼聯球星畢特，組成「畢基的風」席捲南華，成為一時佳話，呢位前南斯拉夫國腳選擇喺香港掛靴，確係球迷之福。所以，羅生透露正密鑼緊鼓，為文仔整件特別版波衫畀球迷收藏，仲打算榮休佢件38號波衫；之不過羅生話唔清楚掛靴有咩儀式，仲搞笑咁話「可能帶枝竹入場，畀佢掛起對波砵」。如果係真嘅話，就真係好睇過戲喎。
年初一開波嘅亞超盃，除咗文仔外，韓職城南一和聽日亦會率先抵港，至於有前阿仙奴球星龍格保領軍嘅日聯清水心跳及中超廣州富力，星期六亦殺到。南華都唔輸蝕，噚日出咗份《叱吒號外》（左圖）造勢，陳七、英雄輝幾位少林兵仲犧牲色相，赤膊上陣，都算有noise㗎。