今次（16日）日馬跑禮拜六，編跑十場，兩場泥地八場草地，草地用C加3跑道。

近日天氣好轉，相信會在正常場地角逐，泥地兩場都跑短途，內檔前置馬，始終形勢佔優。

潘頓搏殺手風順，帶出佔先五場，今次繼續手握重兵；莫雷拉夥拍蘇偉賢，又得蔡約翰支持，一定抗衡到底。

第一場四班草地1000米：「霸勝」剛戰重戴眼罩，在同程取勝姿態甚輕鬆，跑了400米已大步透出，末段保持勁勢贏個多馬位，應該有餘未盡。

這匹四歲當打之馬，復課狀態起得更好，基本上沒有挑剔地方，體重約1,300磅，夠件頭應孭得起重磅，排8檔也理想，如無意外應可再贏。

「正陽清風」型格吸引，試草閘表現一般，但埋門泥閘卻大進展，拍住「首映」鬥放，毫不遜色，姚本輝訓練自購新馬有好成績。此駒正是前馬王「蓮華生輝」之同主馬，有能力搗亂大局。

「勝利寶石」剛戰負於「霸勝」，再度相遇，照計不易反先，然老馬勇況持續。「飛雲騅」走規仍稚嫩，但夠速度，有莫雷拉之助，可爭一席。

第二場五班泥地1200米：「競駿千里」今季只跑了五場，用得唔多，在谷草1200米贏馬，剛戰也跑第三。

今次初跑泥地，翻看試泥閘表現，有多次只隨意跟跑，亦有過上名及勝出，就上次賽前便贏過，且在正常或受天雨影響的場地都可應付，故有信心縱使初跑都會合適，用黃俊減十磅是致勝關鍵。

「天賜寶」剛戰同程力拼僅敗，復課拍跳表現仍佳，梁家俊停賽，換上潘頓執韁，戰鬥力增強，季內曾打叠跑得好。

「大龍騰」加盟容廐養得好，勝後勤操，馬身壯碩，快跳火旺步勁，交出水準，三甲應甚穩。

「踏雪名駒」強配莫雷拉，路程有根據；「永常喜」雖排外檔但夠快切入，都可兼顧。