陳啟宗話知道陳南祿會退,「希望佢身體好,但身體嘅嘢好難講……」唔知係咪有啲暗示,後來物色到Weber後,董事會都覺得佢係合適人選,所以係咁寫傳承嘅題目,「係換CEO嘅伏筆嚟。」咁囝囝兼執董陳文博可能就要磨練多幾年先接棒喇。
恒隆中期業績會除咗講公司業績,好多人都會問下陳啟宗對唔同議題嘅睇法,例如政府有咩增加土地供應嘅辦法,佢就忽然爆咗一句:「香港一定要填海,唔填海解決唔到住屋問題,但填維港我好反對,應該喺合適嘅地方有限度填海。」
坐喺老闆隔籬嘅Weber,當然正襟危坐,但講起地產議題完全冇甩漏。上任兩個月嚟,佢話差唔多去晒內地所有項目,所以好多業務問題都係佢親自答,陳啟宗都話Weber過去兩個月嘅工作,同佢以前做銀行嘅經驗的確唔同,但相信佢會做得越嚟越熟喎。