羅蘭姐連續第九年為海洋公園拍攝哈囉喂宣傳短片，今年就找來新對手麥明詩合作，今日兩人現身主題樂園宣傳，仲有馬國明撐場，今年仲全新加入Sanrio卡通人物，有驚有喜。

羅蘭姐喺台上表示：「第一年幫主題公園拍攝廣告用咗龍婆造型，之後都想甩咗呢個造型，但個個都好鍾意龍婆，其後就出現過Michael Jackson同聖羅蘭造型，今年就係智能龍婆。」麥明詩就話好多人都覺得佢本身面部冇乜表情，做機械人可以發揮到特質。羅蘭姐化身機械龍婆，馬國明話：「龍婆係香港恐怖icon，非羅蘭姐莫屬。」

麥明詩今次同羅蘭姐合作，首次演繹機械人，感覺兩人似孖生姊妹好襯，廣告片好多恐怖場面於後期加工，麥明詩話：「不過有一幕同羅蘭姐做對手戲時，佢撲過嚟嚇我，中氣好勁幫到我入戲，真係嚇親。」羅蘭姐就話之前有預演過，但麥明詩話：「到真實拍攝時羅蘭姐再多三分力，所以好驚。」

麥明詩有興趣去主題樂園玩鬼屋，o依家要搵兵，佢話：「手上有幾張飛，現正招募男士陪我，要搵三位男仔同行好似保鑣咁，有嘢彈出嚟幫我阻擋。」馬國明就笑麥明詩嘅招募可以吸引大把男性。

至於馬國明係咪會同黃心穎一齊玩？佢就話：「會同朋友，萬聖節最開心係可以戴住面具周圍玩冇人認得。」羅蘭姐就提議馬國明可以同女仔嚟玩，對方驚時可以乘機攬住對方，不過表面上黃心穎男仔頭性格，可能大膽過馬國明，佢話：「咁到時我扮驚啦，總之有一個人驚就得，咁先好玩。」麥明詩都同意，仲話：「玩鬼屋同遇到驚嚇時，男女都會有一種賀爾蒙走出嚟，可以增進感情，呢招幾work，不妨試下。」

精選娛聞，喺晒《娛果》
http://fb.com/appledailyent