特首選戰戰幔拉開，正重新考慮選唔選特首嘅政務司司長林鄭月娥，仲有好多工作在身，好似佢負責統籌慶祝明年香港回歸20周年，上星期佢就致函銀行公會，再透過公會轉達信件畀業界，鼓勵銀行為回歸出一分力，包括捐款、贊助或籌辦慶祝活動，即係揼心口啦。
呢封籲捐信件，相信亦有傳送畀其他非政府組織，如商會同其他專業團體，據聞封信都有3、4頁咁長。

冇列最低「消費」

內容講乜呢？林鄭喺信中指出，明年就係特區成立20周年，為彰顯香港繁榮，政府成立一個名為「二十周年慶典基金」（20th Anniversary Fund），統籌慶回歸呢件大事。
當局將舉辦一連串慶祝活動，除政府外，政務司司長亦希望其他機構攜手參與，積極支持，方式可以包括捐錢、贊助一系列體育文娛同晚宴活動，贊助機構可列出企業品牌作推廣；各機構亦可以諗諗，有乜活動可以自行舉辦，若然項目主題同大會題材配合，仲可以將銀行嘅活動，放埋入大會年曆表內云云。
不過，信件就冇講明捐錢最低消費多少，相信呢類周年慶回歸活動，各界都係出心出力，唔使太露骨列明入場費要幾銀嘅。

李華華
mailto:[email protected]