自一九九七年張國榮宣布復出樂壇，絕大部份歌詞均由林夕包辦，他可說是以文字策動張國榮內心世界的一個重要舵手。在為張國榮填寫的多首作品中，林夕表示《我》、《夢到內河》及《夜有所夢》均令他牽起回憶，他更首次談及《我》才是張國榮承認同志身份的自白。

林夕為張國榮（哥哥）寫過無數令人感動、有意境的歌詞，在動筆之前，追求完美的張國榮是否每次都與他討論？林夕日前接受本報訪問時說：「反而好少，我大部份嘅作品都係靠觸摸。在我而言，同歌手有距離重好，同哥哥合作咁耐，都係交詞畀佢唱，唯一佢指明有要求嘅係《紅》呢個大碟名，重有國語歌《我》，佢亦都指定第一句要係『IamwhatIam』，而佢最近錄嘅新歌，佢都話唔好寫啲唔開心嘅嘢。」

公開身份夠勇敢
張國榮這次離去，是有勇氣抑或是逃避的舉動，每個人都可以有其想法，反而在歌詞上，年前一首《左右手》被外界認定是宣示其性取向之作。林夕在電話中說出真相，他說：「呢首歌佢之前冇同我傾過，係我自己想寫用一隻手擁抱，一隻手告別，呢個係一個好大嘅誤解。反而《我》呢首歌先至係哥哥想講自己係同志身份呢樣嘢，首歌頭兩句『我永遠都愛這樣的我』，係嚟自佢睇過一套戲嘅對白『IamwhatIam』，喺本地歌手嚟講，哥哥呢個comeout嘅剖白係一個好勇敢嘅行為。」