黃子華、佘詩曼、C君等等，今日喺銅鑼灣出席《棟篤特工》嘅慶功宴，今次《棟篤特工》嘅票房超過4千萬，子華表示都唔敢期待，就算有一千萬都叫做脫毒，二千萬已經係甩咗票房毒藥，再多都唔敢諗。子華又話今次有四千萬，都算係入場卷，希望之後多啲戲可以拍多啲電影。

問到子華今次係唔係脫污名，子華就話：「我唔覺《一蚊雞保鑣》係啲咩恥辱同污名。」講到會唔會續集或者拍下其他題目，佢就話：「依家未知有冇時間去做，今次好享受，因為幕後每日都會話我知票房幾多，呢世人都未試過咁開心，續唔續集就睇阿佘呢，睇佢有冇時間。」

嚟緊7月子華就會喺紅館開棟篤笑，講到係唔係因為票房好先開，佢就話：「一年前已經諗咗要開，只係期嘅問題，同票房冇關嘅。」阿佘喺側邊話：「我有個廿年冇見嘅朋友，叫我幫佢訂60張。」子華就話：「依家啲人問我留飛都已經係三位數咁問，唔會係幾十張。」

講到個棟篤笑，子華就強調個名唔係叫唔巡迴：「只係今次嘅題目係圍住香港，所以唔會喺其他地方巡迴做。」有報道指子華結婚生仔，佢就話：「多謝大家關心，路遙知馬力，日久見人心，如果真係嘅到時會同大家講。」

精選娛聞，喺晒《娛果》
http://fb.com/appledailyent