人氣韓劇《太陽的後裔》掀起全城煲劇熱，仲有兩集《太陽》就迎來大結局，劇迷都萬分期待雙宋喺劇中能開花結果，但係同時網上亦流傳編劇將會「賜死」宋仲基。

近日有網民聲稱已經喺韓國睇咗第16集結局，仲嚟個全面劇透，真係信不信由你，佢仲言之鑿鑿話：「可以說我騙人，但若你們看完結局跟我講的一樣，回來這篇留言謝我。」似乎講到似層層，其他網民睇完都話信佢，亦都有人話好難過。

到底結局會點？唔想知嘅劇迷就唔好拉下去......


















最後結局就係男主角劉時鎮（宋仲基飾）選擇祖國同埋保護總統，為總統擋咗很多槍，並再次放咗女主角姜暮煙（宋慧喬飾）飛機，又呃暮煙。但暮煙仍然喊住救時鎮，時鎮瞓喺手術床上叫暮煙唔好救自己，又幽默話終於看到佢性感嘅一面，講了一堆話之後就死咗。

暮煙以為佢仲講緊笑，無法接受，暮煙怕會成日想起時鎮，決定放棄做醫生。當佢拎住白石返回沉船灣時，發現自己懷孕了。有咗時鎮骨肉即係代表暮煙都算同時鎮喺埋一齊，因為佢腹中有時鎮嘅BB，變成三位一體，都算大團圓結局。

至於徐大英（陳久飾）同尹明珠（金智媛飾）呢一對就會幸福走下去，結尾亦都會話二人有BB，一家三口好happy。

睇完呢個結局係唔係好傷心呢？網民睇完話終於明白劇集點解叫《太陽的後裔》，因為「後裔」代表主角嘅下一代。但係呢位網民話嘅結局就有少少破綻，事關第15集預告中，時鎮同大英執行新任務時係着上軍服，代表佢哋應該係去打仗，如果保護總統嘅話，照計時鎮唔須要着軍服，就咁着黑色西裝就可以。所以劇迷都唔使完全相信，當個故事仔睇就算，總之下周四大家就自然自有分曉啦。