當年今日
關於我們

《超人》向人仔低頭 《鋼鐵英雄》設強國版預告

蘋果日報 2013/05/23 06:00


幾年前DC漫畫的《超人:強戰回歸》令人失望,加上Marvel嘅《復仇者聯盟》賺到笑,令電影公司同DC重新審視《正義聯盟》計劃嘅可行性,《超人:鋼鐵英雄》(ManofSteel)亦應運而生。

呢部堪稱係重新reboot嘅Superman電影,由《蝙蝠俠》導演基斯杜化路倫(ChristopherNolan)任監製,《戰狼300》及《保衛奇俠》(Watchmen)嘅薩克薛達(ZackSnyder)擔任導演,英國新晉型男亨利卡維(HenryCavill)扮新版超人,型呢?唉,為咗向人民幣服務,超人都要低頭。

噚日(22號)《超人:鋼鐵英雄》發佈咗個「中國特製版」預告,所謂中國特製版,唔係好似《鐵甲奇俠3》咁、有經典珍藏版強國演員演出,而係,預告片一開始,就見到著住恤衫嘅新版超人,一臉誠懇正襟危坐,同內地觀眾打招呼,開場白如下:

「中國的觀眾和影迷朋友,你們好,我是亨利卡維爾(港譯亨利卡維),在即將上映的《超人‧鋼鐵之軀》(港譯《鋼鐵英雄》),我扮演超人的角色。我代表影片導演札克‧施耐德(港譯薩克薛達)、製片人克里斯托弗‧諾蘭(港譯基斯杜化路倫),以及整個劇組和製作團隊,很高興能與你們分享這款最新預告片。我們都希望能夠很快地,在這個暑假,能夠把《超人‧鋼鐵之軀》呈現給中國的觀眾。謝謝。」

中國版預告:
http://ent.sina.com.cn/m/f/2013-05-22/10253926320.shtml

預告片一開始,就是大反派佐德將軍嘅「告人類書」,向超人下最後通牒、限佢24小時之內投降,否則地球將會遭殃。然後就係連場動作場面,極盡官能刺激,擺明速食速銷挑起強國觀眾興趣,同美版三條有故事伏線、交代人物關係與「父子」情嘅預告明顯不同。部戲6月14日喺北美上映,但是否引進內地,暫仍未有一個確實日期。

Superman係美國經典icon,但新一代超人由英國演員接任,基斯杜化解釋超人只係美國人嘅養子,唔需要由美國人飾演。就好似鐵甲奇俠咁,明明係一個反共又反華嘅「敵對勢力」象徵(鐵甲奇俠誕生於上世紀六十年代,專責要對付嘅敵人就係越共),依家喺內地版嘅《鐵甲奇俠3》,唔止變成「中國人嘅朋友」,更加係由中國人救番佢條命仔,「易容術」令人驚嘆。未知Superman會否又需要入鄉隨俗?