韓國人氣男團Wanna One近日是非多多，日前趁回歸上音樂直播節目，點知喺後台數公司嘅片段就意外流出，而上月21歲嘅成員姜丹尼爾就被爆情史，女rapper陸智譚就喺網上自爆同姜丹尼爾拍過拖，令陸智譚受到批評，指佢借姜丹尼爾炒作。

而今日陸智譚又發功，佢仲喺網上發文指事件爆出後受到人恐嚇，佢文中寫道：「上個月，嗰啲想帶我去機場嘅韓國人、外國人、亞洲人，有成數十架車，仲有我一個人喺街上尾隨我嘅人。」又指喺上月14日(即爆出同姜丹尼爾拍過拖)當日，佢姐姐接佢到美國，佢留言：「YMC(Wanna One事務所)、CJ到底做甚麼？無視我嘅一切聯繫。」佢又點名多人包括Jessi、Aliee等都無視佢，聲稱自己身上發生可怕嘅事情。

陸智譚指自己只係想繼續活着，佢話喺姜丹尼爾事件，佢只係想同當事人親自解決，但係事務所就好似把組合藏起來，又出現咗大量惡評，而喺上月16號，佢從美國返回韓國後就一直喺醫院匿埋，真係好可怕，留言更指：「連我家人都唔放過去進行恐嚇嘅大企業，以及CJ、YMC等要做出正式道歉及解釋，以及幾位所屬藝人寫出道歉文。如果唔道歉，我會喺日內舉行記者會。同時亦會起訴呢個月對我所有惡評嘅發佈者。」

不過網民普遍就唔撐陸智譚，覺得佢趁Wanna One近日回歸樂壇之際，再次搞埋啲小動作，有網民就覺得唔明點解要YMC等道歉，又指道歉嘅應該係陸智譚本人才是，同時佢嘅行徑令人摸不着頭腦。而CJ方面就指去年同陸智譚喺協議下解約，並唔知道佢想點同埋如何道歉，YMC亦指冇同陸智譚有任何聯繫，唔知道要道乜嘢歉，佢哋會盡全力保護藝人唔受傷害。

另外，Wanna One今日出發去智利出演音樂節目，佢哋喺現場見到傳媒就鞠躬，為直播片段意外流出事件道歉。

相關新聞連結：
被爆與女Rapper情史 姜丹尼爾今蒲頭照派心心
http://bit.ly/2IH9tYq

直播數事務所引發爭議 Wanna One道歉：深深反省中
http://bit.ly/2FQf2Gx

更多韓流，喺晒《娛果》
http://fb.com/appledailyent